A Guarda acolle este xoves unha reunión aberta á cidadanía sobre o Plan Rehabita

• Esta reunión pode ser de interese para todas as persoas que teñan pensado, a curto ou medio prazo, realizar algunha obra que implique mellora da eficiencia enerxética do seu inmoble: illamento da fachada, substitución de ventás, cambio de caldeira, instalación de placas fotovoltaicas, etc.
• A cita será este xoves 27 de abril ás 20:30h no Salón de Plenos da Casa dos Alonso, o evento será tamén retransmitido en streaming pola canle de Youtube municipal.

Nesta reunión a veciñanza poderá coñecer de preto o Plan Rehabita, un plan de colaboración público-privada promovido polo Concello e que ten coma obxectivos mellorar a imaxe das rúas e barrios da Guarda, aumentar a eficiencia enerxética das vivendas e actuar como motor de desenvolvemento económico da vila, conseguindo ademais que a cidadanía poda verse beneficiada polas diversas subvencións dos Fondos Next Generation EU.

Para acadar todos estes obxectivos lévase traballando desde o ano pasado ofrecendo información á cidadanía e conformando a un grupo de “puntos formados” entre os que se atopan diversas empresas e profesionais da comarca que traballan no eido da rehabilitación, xestión de subvencións, servizos enerxéticos, etc.

Durante esta reunión as persoas asistentes poderán coñecer aos “puntos formados” e tamén resolver dúbidas sobre as subvencións, actuacións que encaixarían nas mesmas, etc.