A Guarda contrata a 15 persoas con cargo ao Plan Concellos 2019

O Concello da Guarda ven de incorporar ao seu cadro de persoal a un total de 15 traballadores que prestarán servizo temporalmente en diferentes departamentos e servizos municipais, con contratos que varían dende os 6 ata o 9 meses de duración grazas á Liña 3 de Emprego para Conservación e funcionamento de bens e servizos municipais do Plan Concellos 2019 da Deputación de Pontevedra.

Os beneficiarios destes contratos temporais foron persoas desempregadas seleccionadas a través das Oficinas do Servizo Público de Emprego de Galicia como demandantes non ocupados.

Máis polo miúdo, o Concello da Guarda contará con 2 traballadores para Axudantes do Camión da recollida do Lixo (9meses), un Oficial de Albanel(9 meses), 2 Peóns para desbroce(9 meses), 2 Varredores (9 meses), 4 Limpeza de Praias (6 meses), 1 Auxiliar para o Dpto. de Cultura (9 meses), 1 Animador Sociocultural (8 meses), 1 Técnico informático (8 meses) e 1 Técnico de información turística (8 meses).

O Concello da Guarda recibe deste xeito unha achega da Deputación de Pontevedra por valor de 164,229,25€ para a contratación temporal de 15 desempregados, que se atopan dende esta semana xa prestando servizo. Neste sentido a Deputación de Pontevedra colabora na promoción do emprego e permite que reforcemos o noso cadro de persoal cara ao verán para prestar os servizos que necesita unha vila turística como a nosa que ve incrementada a súa poboación de forma considerable.