A Guarda gaña adeptos na semana Santa 2019

Rematada xa a Semana Santa 2019 o Concello da Guarda fai un balance moi positivo desta tempada, cun incremento notable de visitantes, grazas a unha extraordinaria climatoloxía, que propiciou que moitas persoas se achegasen a gozar da nosa gastronomía, o noso patrimonio, a nosa oferta cultural e, como non, as nosas paisaxes e a nosa natureza.

Hostalaría e ocupación hoteleira

En canto aos resultados de ocupación hoteleira media durante a Semana Santa, as previsións para a Comarca do Baixo Miño situábanse no 60%, repercutindo con moita incidencia este ano a climatoloxía, que propiciou moitas reservas de última hora, atopándose os hoteis da Guarda cunha ocupación media de entre un 75% e un 90%, varios deles con 4 días de ocupación ao 100%.

Nos establecementos de oferta gastronómica coma Restaurantes, bares e cafeterías, destacan unha afluencia masiva de comensais, tanto nas comidas como nas ceas, esgotando moitos dos produtos ao longo desta semana santa e mesmo completando o aforo de moitos establecementos, un dato moi significativo tamén, posto que moitos visitantes se achegan á Guarda para gozar da súa afamada oferta gastronómica, con produtos frescos do mar.

Rede de Museos e visitas guiadas

Ao longo desta Semana Santa A Guarda ofertou diversas visitas guiadas polo Casco histórico da vila, coa temática Prazas Antigas e Prazas Novas, onde coñeceron a historia das nosas prazas como os diferentes nomes e usos que tiveron ao longo dos anos, e tamén no Monte Santa Trega e o seu recinto arqueolóxico, visitas nas que se contabilizaron máis de 500 persoas, maioritariamente visitantes galegos, madrileños, pero tamén estranxeiros de países como Guatemala, República Dominicana ou Estados Unidos. Moitos dos visitantes aproveitaron para coñecer e desfrutar das celebracións relixiosas da Guarda asistindo ás procesións que tiveron lugar polas rúas do casco urbano o xoves e venres santo.

A Rede de Museos da Guarda tamén foi visitada polo numerosos visitantes e turistas que escolleron a vila da Guarda do xoves ao domingo de Semana Santa.

O Museo do Mar recibiu a máis 370 persoas que coñeceron as dúas coleccións: etnográfica cos aparellos de pesca e a malacolóxica coa selección de cunchas mariñas. Moitos dos visitantes accederon a terraza e desfrutaron das visitas que ofrece a Atalaia ao porto da Guarda sendo moi fotografado o espigón co novo pintado.

O Centro Interpretación do Castelo de Santa Cruz foi visitado por preto de 250 persoas, que aproveitaron para coñecer a fortaleza e a súa historia. Ademais a pranta baixa adicouse á Exposición de Maquetas e figuras do rosaleiro Praxíteles González, destacando as maquetas das Catedrais de Notre Dame e Santiago de Compostela.

En canto as persoas que visitaron o Monte Santa Trega foron preto de 9.000 persoas neste catro días, de xoves a domingo. Destacando o venres Santo como ven sendo habitual en anos anteriores. O 25% das persoas que visitaron o monte accederon ao MASAT, Museo Arqueolóxico de Santa Trega, duplicando o número de visitantes o venres.

Oficina de Turismo

A oficina de turismo estivo aberta na Praza do Reló e atendeu a visitantes chegados principalmente de Madrid e da nosa comunidade autónoma, sen esquecer aos peregrinos estranxeiros.

Praias

Aínda que as temperaturas medias roldaron entre os 22 e os 29 grados, foron moitos os bañistas que non deixaron pasar esta oportunidade para visitar as nosas praias, preferentemente a praia marítima de Area Grande e a Praia Fluvial do Muíño, ámbalas dúas con Bandeira Azul.

Peregrinos

En canto ao número de peregrinos, dende a declaración coma oficial do Camiño Portugués da Costa, a afluencia de peregrinos vai en aumento, un dato que se mantén segundo os datos da Oficina do Peregrino, destacando tamén que o Camiño Portugués da Costa sobe unha posición con respecto á Semana Santa do ano pasado.