A Guarda inaugura a Praza Tito Lemos e o nomea Fillo Adoptivo

• Foi nun pleno extraordinario cargado de emoción que tivo lugar esta mañá na Casa dos Alonso.
• Tamén se descubríu un busto realizado por Magín Picallo na que, dende hoxe é, a Praza Tito Lemos na Rúa Manuel Álvarez.

O Concello da Guarda e a Asociación Pro-Homenaxe “Tito Lemos”, continúan coas accións para por en valor a figura do médico falecido en novembro de 2019, tendo en conta a súa ampla traxectoria profesional e o seu compromiso e adicación coa cidadanía guardesa, ben coñecida por todos os guardeses e guardesas, cunha actitude sempre cordial e servicial que deixou pegada nos seus pacientes, familiares e amigos.

Joaquín Lemos Zunzunegui “Tito Lemos”, destacou sempre pola súa calidade humana e é precisamente por este motivo polo que se creou na Guarda a Asociación Pro-Homenaxe “Tito Lemos” que pretende homenaxear a figura deste doutor na Guarda, pola súa traxectoria profesional e persoal vinculada a esta vila, ademais do recoñecemento e agarimo dos seus pacientes e dos seus compañeiros de profesión.

Dentro das accións e obxectivos fixados pola Asociación, destaca o xa inaugurado observatorio no Monte Santa Trega, a declaración como fillo adoptivo na Guarda ou a colocación dun busto diante da que foi a súa clínica, dando o seu nome tamén á praza onde está ubicada.

Na xornada deste sábado día 15 de abril o Salón de Plenos acolleu unha emotiva sesión extraordinaria cun único punto na orde do día, a declaración de Joaquín Lemos Zunzunegui “Tito Lemos” coma Fillo Adoptivo da Guarda, sesión plenaria que se seguíu en streaming na canle de Youtube do Concello da Guarda e na que tiveron a oportunidade de intervir os representantes de cada grupo político con representación municipal, así coma os familiares do homenaxeado, que tamén puideron facer o mataselado especial para esta homenaxe.

Unha vez rematada a sesión plenaria, realizouse a descuberta do busto realizado por Magín Picallo na que é, dende este sábado, a Praza de Tito Lemos na Rúa Manuel Álvarez da Guarda.

Dende o Concello da Guarda e a Asociación Pro-Homenaxe “Tito Lemos” agradécese a toda a cidadanía e persoas que interviron nestas accións para manter viva a súa figura.