A Guarda participa no I Foro do Río Miño Transfronteirizo

Valença do Minho acolleu este xoves día 21 de xuño o I Fórum do Río Miño Transfronteirizo, que contou coa representación da Guarda, a través do seu Alcalde Antonio Lomba.

Este Fórum senta as bases da ‘Estratexia 2030’, que marcará as liñas de actuación en materia de cooperación para o territorio durante a próxima década. A gobernanza, a mobilidade, o turismo, os sectores produtivos, a cultura e comercio tradicional foron os temas centrais que se trataron.

Para Antonio Lomba é preciso establecer unhas medidas en materia de mobilidade que melloren as comunicacións por estrada entre A Guarda e o resto do seu territorio limítrofe, mellorando os tempos do desprazamentos da poboación

Neste senso o Alcalde da Guarda destacou tamén a importancia de acadar un consenso para unha comunicación sostible para persoas e vehículos entre A Guarda e Caminha a medio e longo prazo. Reflexionou tamén sobre o deterioro do litoral do Esteiro do Miño e a deixación que o goberno español está facendo ate o de agora ao respecto.

Neste I Foro recalcouse a idea de que nas vindeiras actuacións os fondos europeos repercutan directamente no territorio da “raia” e nos seus municipios, para evitar que os beneficiarios sexan municipios distintos aos destas áreas, entendendo o Miño como a columna vertebral do territorio no horizonte 2020-2030 e poder optar a diferentes tipos de axudas europeas.