A Guarda presume de deportistas neste comezo de 2025

A Guarda presume de deportistas neste comezo de 2025!

O 2024 rematou ao grande para as nadadoras Rosalía Soler do Club Natación Galaico e Paula Baz do Real Club Náutico Vigo. Ambas conseguiron moi bos resultados no Campionato Galego Absoluto de Inverno de Natación en Santiago de Compostela, celebrado do 27 ao 29 de decembro.

Paula acadou mellores marcas persoais en 50 braza e 50 libres. Ademais, participou no 200 libres e no 100 braza de xeito individual e colaborou no 4×50, 4×100 e 4×200 libre, así como 4×50 e 4×100 estilos, nas postas de braza e crol respectivamente.

Rosalía Soler rematou con tres ouros por relevos no 4×100 libre, no 4×50 libre con récord no campionato e no 4×50 estilos con novo récord galego absoluto. Tamén trouxo para casa tres pratas: 4×100 estilos (posta de costas), 100 costas e 100 bolboretas, estas dúas últimas coa súa mellor marca persoal. Para rematar esta fazaña, acadou o bronce no 50 costas e o cuarto posto no 50 bolboreta.

En Santiago de Compostela, tamén estaban as xogadoras de balonmán Carmen Magallanes, Daniela Álvarez e Ángela Martínez. As tres asistiron o domingo 29 de decembro á gala da Federación Galega de Balonmán para a presentación das seleccións galegas.

Agora as xogadoras xa están en Barcelona, a horas de estrearse no Campionato de España de Seleccións Autonómicas, que se celebra do 3 ao 8 de xaneiro. Daniela e Ángela arrancan a súa participación mañá ás 11:15 coa selección infantil que se enfronta a Canarias; pouco despois, ás 13:00h, Carmen xogará co equipo xuvenil o partido contra Euskadi.

E no atletismo, os irmáns Christian e Álex Sierpes dan o salto á era profesional nesta tempada 2025 coa fichaxe polo club Vicky Foods Athletics, o equipo de élite de Isaac Viciosa en Valladolid.

Parabéns a todas e todos por este comezo de ano! Agardamos escoitar dos vosos éxitos neste 2025!