A novela Odio, gañadora do I Premio Neira Vilas preséntase na Guarda este venres

O autor Gabriel Romero de Ávila, presenta a súa novela xuvenil “Odio” na Guarda. Esta novela resultou ser a gañadora do I Premio Xosé Neira Vilas 2025 de literatura xuvenil.

Gabriel Romero elixe A Guarda para presentar este libro xa que a considera “como unha segunda casa”, onde leva dez anos traballando como médico do PAC da Guarda. A novela publicada en xullo pola Editorial Galaxia recolle unha historia de aventura e ciencia ficción xuvenil.

A presentación terá lugar o venres 10 de outubro ás 20:00h na Biblioteca Municipal da Guarda.

“Todo apunta ao comezo dunha nova guerra entre humanos e droides nas Terras de Poñente.

Neo Vigo, a cidade dos neons e os rañaceos antigravitatorios, aínda lembra a bomba atómica que estourou sobre o estadio de Balaídos hai dez anos e que terminou coa revolta da Nai Computadora. Pero agora hai un influencer que se dedica a reavivar o odio entre os vellos bandos, á vez que apareceron mortos seis replicantes no Museo do Pobo Galego de Compostela. Seis policías que participaron nunha carreira ilegal para divertimento dos humanos, e da que pronto vai haber unha nova edición xunto á catedral de Auria, da que toda a galaxia vai estar pendente.

Este é un caso para a inspectora N4rv43z, da División de Seguridade da Fundación Omnia”