Convocatoria do proceso selectivo para a contratación dun informador turístico

O Concello da Guarda vén de publicar as bases para a contratación laboral temporal dunha praza de persoal para a oficina de información turística do Concello da Guarda, ao abeiro dunha subvención convocada pola Axencia de Turismo de Galicia por Resolución de 2 de xaneiro de 2018.

As funcións a desenvolver consistirán en proporcionar ós turistas e viaxeiros que o soliciten información no referente a aloxamento, transporte, gastronomía, etc, sendo a modalidade de contratación a de obra ou servizo determinado. A retribución será de 1.358,03 euros mensuais brutos, incluída a prorrata de pagas extras, cunha xornada de 37,5 horas semanais (de luns a domingo) co horario que determine a Concellería de Turismo do Concello de A Guarda.  O contrato finalizará o 15 de setembro de 2018.

O proceso de selección realizarase en forma de oposición libre. Para seren admitidos á realización das probas selectivas os e as aspirantes deberán estar en posesión da  titulación de Técnico superior de información e comercialización turística ou Técnico superior en guía, información e asistencia turística, Técnico en empresas e actividades turísticas ou Grao ou Diplomado/a en turismo ou equivalente homologado ou ben contar coa habilitación de guías se turismo. Os solicitantes deberán figurar como desempregados no Servizo Público de Emprego de Galicia.

O prazo para a presentación de instancias estará aberto ata o venres 8 de xuño. O sistema selectivo consistirá na realización dun exame tipo test de 40 preguntas relacionadas co temario especificado nas bases da convocatoria. O día, hora e lugar da realización deste proba, que terá unha duración de 60 minutos, indicarase na resolución da alcaldía pola que se publique o listado provisional de admitidos e excluídos.

As persoas interesadas poderán descargar as bases da convocatoria así como o modelo de instancia de solicitude na Sede Electrónica do Concello da Guarda e nas seguintes ligazóns:

Bases da convocatoria para a contratación dun informador turístico

Modelo de instancia para o proceso selectivo dun informador turístico