Despois de anos de xestións municipais a nova Escola Infantil da Guarda máis cerca de facerse realidade

● O concello da Guarda levará a pleno a aprobación do proxecto da nova Escola Infantil e asinará en breve o convenio para a súa construción.
● O custo da obra ascende a 691.747€ dos cales o concello terá que aportar 281.747€ ademais de facerse cargo do custo da redacción do proxecto.

Despois de anos de xestións do alcalde da Guarda, Antonio Lomba e de miles de quilómetros en viaxes a Santiago, acompañado, a maioría das veces, pola anterior concelleira de Servizos Sociais, Tere Vicente, a construción da nova Escola Infantil da Guarda plasmarase na sinatura dun convenio entre a Xunta e o concello en próximas datas.

Ante a necesidade evidente de contar con máis prazas de atención a infancia de 0-3 anos na Guarda. No ano 2017 o alcalde tomou a decisión de encargar e financiar, por conta do concello, o proxecto de construción da nova Escola Infantil, que estará emprazada na parcela municipal que actualmente ocupan as que foron vivendas de mestres do antigo colexio Manuel Rodríguez Sinde.

A consellería de Política Social remitiu fai uns días o borrador do convenio que comprometerá a Xunta e concello na execución da obra. Esta actuación representa un importante investimento para o concello da Guarda. Un esforzo que o propio alcalde considera urxente e prioritario para a vila: “esta actuación é unha necesidade para avanzar realmente na conciliación da vida familiar e laboral, mellorar a calidade de vida das veciñas e veciños, sobre todo os máis novos, e forma parte das políticas contra a crise demográfica, orientadas a frear a diminución de poboación na localidade”.