Inícianse as actuación de restauración no barrio Mergelina do xacemento de Santa Trega

O martes 15 de maio, xornalistas da cadea norteamericana ABC gravarán na Guarda unha reportaxe sobre o xacemento do barrio Mergelina.

A Deputación de Pontevedra vén de anunciar o inicio de novas actuacións no Castro de Santa Trega enmarcadas no protocolo asinado co Ministerio de Fomento para a posta en valor dos xacementos galaico-romanos da provincia. A institución provincial comezará hoxe mesmo as tarefas de restauración e consolidación no barrio Mergelina do xacemento de Santa Trega, cunha duración aproximada de 5 meses

A institución provincial actuará en 2.642 metros cadrados no barrio Mergelina do xacemento de Santa Trega, para o que conta cun orzamento de 367.719 euros. A restauración e consolidación do xacemento guardés será executada por Terra Arqueos baixo a coordinación de Rafael Rodríguez, o arqueólogo da Deputación que dirixiu a intervención realizada no Trega entre setembro de 2015 e abril de 2016. Unha vez rematada a actuación, será o Ministerio de Fomento quen entre no castro para levar a cabo o proxecto de musealización.

A presidenta da Deputación de Pontevedra, Carmela Silva, recordou en rolda de prensa que durante a fase de escavación do barrio Mergelina «puidemos constatar que o castro foi ocupado antes do que pensábamos, desde o século IV a.C. Tamén sacamos á luz 43 novas estruturas arquitectónicas que compoñen 11 unidades familiares e ata 43.833 pezas».

A presidenta da institución provincial aproveitou tamén para dar a coñecer a grande proxección que está a ter a actuación realizada no xacemento arqueolóxico do Trega. Deste xeito, adiantou que o martes 15 de maio,  xornalistas da cadea norteamericana ABC estarán na Guarda para gravar unha reportaxe do xacemento no marco do programa “Ocean Treks”, que se emite en todos os Estados Unidos.