O Piueiro presenta este xoves o ‘Caderno da Tripulación’
O Concello da Guarda con Alvarellos Editora presenta este xoves 12 de decembro ás 19:00 horas o libro “Piueiro. Caderno da Tripulación” na Casa dos Alonso
Esta é unha obra moi singular, un proxecto nacido do maxín do fotógrafo Manuel Álvarez Álvarez e que conta cos inspirados e rotundos versos da poeta Marta Dacosta. Reúne os rostros de 20 coñecidas persoas mariñeiras da Guarda para loitar contra a desmemoria e o patrimonio perdido.
Ademais, Piueiro conta coa colaboración do historiador Joaquín Miguel Villa Álvarez e dun dos retratados, o patrón de pesca Xaquín Cadilla. Ambos os dous intervirán no acto de presentación xunto cos artífices do libro: Manuel Álvarez e Marta Dacosta; ademais, contarase coa participación do alcalde da Guarda, Roberto Carrero, e do editor, Henrique Alvarellos.
O volume rende homenaxe póstuma a Domingo Carrero Álvarez, Minxos, mestre carpinteiro de ribeira do Baixo Miño, grazas a quen foi posible construír en 2019 o volanteiro Piueiro. Con máis de 92 anos, foi memoria viva, herdada do pai e avó, para recuperar un barco emblemático.
