Máis de 1500 persoas visitaron a exposición fotográfica «Así Somos» na Guarda

O pasado domingo día 26 de agosto finalizou a Exposición fotográfica «Así Somos», que dende o 20 de xullo se atopaba na Sala de Exposicións da Casa dos Alonsos da Guarda, rexistrando unha gran acollida de público con máis de 1500 persoas que se achegaron a visualizar esta mostra cun total de sesenta fotografías sacadas entre os anos 2014 e 2018 onde se reflexa o día a día dos veciños da vila.

As obras son da autoría do fotógrafo Francés afincado na Guarda Marius Kraja, a organización e produción da mostra correu a cargo do departamento de cultura do concello da Guarda.

A mostra fixo un repaso polos diferente oficios da vila, con especial atención ós relacionados co mundo do mar, pero tamén os momentos de ocio, as festas e tradicións, estampas de vida cotiá, conformaron o espírito desta proposta. A maiores, unha proxección recolleu máis de 200 fotografías onde o autor enfoca a vila mariñeira da Guarda dende o seu singular obxectivo.

Como novidade organizáronse dous obradoiros como actividades paralelas da exposición: O primeiro sobre o oficio das redeiras a cargo da Asociación de Redeiras do Baixo Miño “ Atalaia” onde explicaron aos presentes como é o seu traballo, que utensilios empregan e cales son os diferentes tipos de redes que se poden facer, segundo o arte de pesca. O segundo obradoiro versou sobre as alfombras florais, a cargo da recentemente formada Asociación Cultural de Alfombras da Guarda. O Obradoiro «Alfombras», de carácter aberto e para todos os públicos, tivo unha gran aceptación, e os participantes recibiron explicacións sobre o traballo da confección das alfombras florais na Guarda, como funciona esta interesante labor, de recollida previa de flores, follas, así coma os deseños que ano a ano se realizan para esta ocasión e que atraen a numerosos visitantes á vila guardesa, tamén os máis pequenos puideron participar confeccionando varias alfombras florais que quedarán expostas durante algúns días neste espazo.