“Noites no Castelo” e Pistactiva: éxitos da man da música galega e o espectáculo circense na nosa vila

O dobre concerto de “Noites no Castelo” e o espectáculo circense da man de Circo Chosko e Isla Letriska foron dous dos pratos fortes da programación cultural deste verán.

Preto de 2.000 persoas acudiron á fortaleza guardesa o pasado sábado, 22 de xullo, para o dobre concerto ofertado no marco do xa tradicional “Noites no Castelo”. O espectáculo comezou pasadas as 22:00 horas no Castelo de Santa Cruz, coa actuación do gaiteiro Xosé Manuel Budiño, ao que se uniu a cantante Mercedes Peón como convidada especial para interpretar algunhas das pezas do concerto, que se enmarca na xira “Paralaia” 20 Aniversario do músico moañés.

Preto da media noite, a gaiteira Susana Seivane tomou o testemuño do espectáculo, cun repertorio de cancións propias e tradicionais, que animou aos espectadores introducindo elementos sorpresa. Así, por exemplo, incorporáronse a ela artistas como a gaiteira guardesa Nadia Vázquez e o pequeno Iago, un virtuoso da gaita aos seus 9 anos. Seivane puxo o broche de ouro a unha noite dedicada á música galega e á súa tradición.

Para celebrar o día de Galicia, o dobre espectáculo circense Pistactiva convocou onte a pequenos e maiores no Auditorio de San Bieito onde, chegadas as 20.30 horas e coas prazas totalmente ocupadas, deu comezo a función: Isla Letriska combinou os malabares co humor ao máis puro estilo clown, mentres Circo Chosko amosou as súas habilidades acróbatas e no trapecio, sen deixar ao marxe as súas capacidades humorísticas. Ambos cativaron ao numeroso público, de preto de 400 personas, cun espectáculo participativo e moi divertido.