O Clinic do Celta forma na Guarda a 26 rapaces de 4 a 14 anos

Un total de 26 nenos da Guarda desfrutaron estes días do Clinic que o RC Celta de Vigo organizaba no campo de fútbol da Sangriña.

Coa colaboración do Concello da Guarda e do Sporting Guardés, esta actividade permite á rapazada seguir fortalecendo as habilidades futbolísticas, sen esquecer os valores do deporte.

Esta terceira edición volveu a ser unha oportunidade para que os nenos adestraran, aínda que fose por uns días, como os seus xogadores favoritos. Ademais de aprender e mellorar o seu xogo e habilidade, a diversión tamén reinou no campo da Sangriña.

“Foi moi fácil traballar con eles; son supereducados”, destacaba un dos seus adestradores estes días, Martín Varela. Ademais, “agardamos volver o ano que vén, aínda que falaremos co alcalde para que nos mellore o tempo”, engadía Varela, sobre os días de chuvia nos que lle tocou traballar.

Aínda así, os nenos guardeses aproveitaron ao máximo esta oportunidade e como dicía, Víctor Lomba, presidente do Sporting Guardés: “esta é a terceira edición, mais agardamos que haxa máis”.

Para rematar o alcalde quixo agradecer ao RC Celta por elixir A Guarda para esta actividade, agardando “que de aquí saian moi bos xogadores tanto para o Sporting Guardés, como para o Celta de Vigo”. O Celta agasallou ao Sporting e ao Concello cun banderín de capitán co escudo do club vigués.