O comercio da Guarda consolídase co goberno de Roberto Carrero cun aumento do 52% das licenzas nos últimos tres anos

O tecido do comercio local da Guarda continúa crecendo co goberno de Roberto Carrero. En 2025 aumentáronse as licenzas nun 12,89%, o que implica un crecemento nos últimos tres do 52,85%.

“Temos unha vila forte e o comercio é unha vara de medir perfecta”, asegura o alcalde da Guarda, Roberto Carrero. “O comercio dunha vila non só dá servizos, senón que tamén aporta vida ás súas rúas”.

Destaca que o 55,85% das licenzas son para iniciar novas actividades comerciais, mentres que o resto débense ao cambio de titular. Isto indica que non só abren novos locais, senón que os comercios existentes continúan coa súa actividade grazas á renovación dos que apostan polo futuro da Guarda.

Ademais, as novas licenzas de actividades son moi variadas: tendas e comercios, bares, servizos sanitarios ou actividade deportiva. “O tecido comercial da Guarda é cada vez máis variado, renovado de calidade grazas o emprendemento da cidadanía”

Sen dúbida ningunha, esta florecemento de actividade que oferta servizos débese, entre outros factores, ao traballo de promoción da vila guardesa realizada polo equipo encabezado por Roberto Carrero que apostou forte por unha promoción extensiva da vila en toda Galicia e España.

“A afluencia de turistas e visitantes, así como peregrinos, cada vez máis desestacionalizada, supón un novo impulso para os comercios da Guarda, xa que dispomos dunha clientela máis aló do local durante gran parte do ano”.