O Concello asina con Cultura un convenio para a restauración do Castelo de Santa Cruz

A Consellería compromete un investimento de 42.900€ nas obras de revocadura da fachada da edificación principal do castelo, a fin de evitar o seu deterioro.

O alcalde do Concello da Guarda, Antonio Lomba, e o conselleiro de Cultura, Educación e Ordenación Universitaria, Román Rodríguez, asinaron este luns un convenio de colaboración para a conservación e reparación do Castelo de Santa Cruz.

O acordo recolle a posta a disposición dos terreos e inmobles necesarios para a execución das obras de revocadura da fachada do centro de interpretación situado no interior da fortaleza, toda vez que a porosidade das paredes do espazo museístico facilita a entrada de auga procedente do exterior. Nesta liña, o rexedor local destacou a necesidade de acadar unha solución definitiva á problemática, tras «varios intentos de modificar o sistema de illamento» por parte da Consellería, con resultado «insatisfactorio».

Así as cousas, o organismo da Xunta destinará un investimento de 42.900 euros para desenvolver os traballos correspondentes, incluídos no Plan estratéxico para a protección e a conservación do patrimonio cultural de Galicia. Os traballos de mellora e impermeabilización das prestacións térmicas e de impermeabilización da fachada da edificación principal do castelo serán desenvoltos polo organismo da Xunta, a través da Dirección Xeral do Patrimonio Cultural. As intervencións centraranse principalmente na fachada sur da edificación, por ser esta a zona máis exposta ás inclemencias meteorolóxicas.

O Castelo de Santa Cruz

O Castelo de Santa Cruz está catalogado como Ben de Interese Cultural (BIC), coa categoría de Monumento. Trátase dunha estrutura defensiva transfronteiriza que se inscribe dentro do grupo de fortíns, atalaias e fachos que se erixiron nos séculos XVII e XVIII ao logo das marxes do río Miño. A edificación principal está situada no interior do castelo, utilizada como espazo multiusos e centro de interpretación das fortalezas transfronteirizas.