O Concello da Guarda comezou a limpeza manual de praias cara ao verán
Despois da limpeza de urxencia que tivo que facerse nas praias en Semana Santa, o Concello da Guarda está realizando unha limpeza manual exhaustiva das praias para preparalas e telas en bo estado cara ao verán que dará comezo o próximo mes.
Despois da limpeza de urxencia que tivo que facerse nas praias en Semana Santa, o Concello da Guarda está realizando unha limpeza manual exhaustiva das praias para preparalas e telas en bo estado cara ao verán que dará comezo o próximo mes.
A brigada de limpeza de praias estará composta por catro traballadores contratados ao abeiro do Plan Concellos da Deputación para este fin. O obxectivo desta brigada é manter, durante a época estival, os areais e os servizos das praias limpos e en bo estado. Para o plan de choque inicial, dado a cantidade de lixo acumulado, esta brigada esta reforzada con catro traballadores máis.
Despois de obter permiso de Medio Ambiente para realizar unha primeira limpeza mecanizada, dende o Concello optouse por unha limpeza manual como se ven realizando nos últimos anos. Esta limpeza é moito máis custosa pero tamén moito mellor en termos de conservación medioambiental. O sistema que se está a empregar consiste na acumulación de lixo en montes ou en sacos, segundo o tamaño dos fragmentos, para que logo un tractor faga o traslado ata o punto de recollida do camión. En ningún caso se utilizan sistemas mecánicos de rastrillado da area. Queremos conseguir un uso da praia e do seu entorno no que a xente poida gozar da natureza con criterios de sostibilidade medioambiental.
A previsión é ter rematado nunha semana o plan de choque para logo continuar co mantemento diario. Para ter as praias limpas durante o verán o Concello solicita a colaboración dos usuarios para que non deixen lixo nin bolsas nos areais e o trasladen aos contedores habilitados para tal efecto. Manter as praias en bo estado é cousa de todos.