O concello da Guarda desbroza a estrada de Circunvalación diante da inacción da Xunta de Galicia

• A 6 de xullo, a Xunta de Galicia, aínda non comezou as tarefas de desbroce na estrada de Circunvalación ao Monte Trega co que se produce un aumento da perigosidade na vía.
• concello da Guarda comeza o desbroce das zonas máis perigosas diante da inmobilidade da Xunta.

O concello da Guarda ten demandado da Xunta de Galicia, en numerosas ocasións, obras de mellora na estrada de Circunvalación ao Monte Santa Trega, a PO-352.

Estas obras de mellora pasan, segundo o alcalde, Antonio Lomba, polo ancheamento da estrada e a construción dunha senda peonil e ciclable, para dar seguridade ao vial, tanto para desprazarse a Camposancos e as praias como para facer deporte.

Á vista do inmobilismo da Xunta diante dunha actuación que ten como fin principal dotar de seguridade viaria unha estrada que resulta perigosa pola súa limitada anchura nalgúns tramos e polas numerosas persoas que a usan, o concello da Guarda redactou un anteproxecto para a “Senda de Circunvalación ao Monte Trega”.

O concello está dando a coñecer este documento en busca de financiamento para esta actuación tan importante para a nosa localidade. Foi entregado a Xunta, está incluído nun plan de Sostibilidade Turística en Destino e mesmo se fixo chegar a demanda a AECT Río Miño en busca de fondos.

Todo o anterior cobra especial importancia cada comezo de verán, cando a Xunta, sabendo das deficiencias da estrada de Circunvalación, atrasa o desbroce das súas cunetas e nono executa ata que dende o concello se insiste ata a saciedade e a situación xa é insostible.

O alcalde declaraba esta maña que: “este ano, a 6 de xullo, a Xunta aínda non comezou as tarefas de desbroce en Circunvalación. A pesar de que resulta evidente que a situación se volve mais perigosa día a día. Diante desta situación de abandono hoxe mesmo ordenei comezar as tarefas de desbroce das zonas máis perigosas da estrada por conta do concello. Unha vez máis, a Xunta de Galicia fai deixación das súas funcións deixando aos veciños da Guarda sen os servizos aos que temos dereito.