O concello da Guarda inicia as obras de humanización da Rúa Manuel Rodríguez Sinde

O Concello da Guarda iniciou este xoves as obras de humanización da rúa Manuel Rodríguez Sinde dende o cruce coa rúa Calvario ata o cruce coa rúa San Bernardo con cargo ao Plan Concellos da Deputación de Pontevedra.

Esta humanización ven a completar as realizadas na contorna dando a este tramo de rúa a tipoloxía do casco histórico: pavimentado en pedra con plataforma única. Eliminaranse os estacionamentos para gañar espazo para os peóns, haberá un carril de rodadura de tres metros e o resto do ancho da rúa, repartido a ambos lados, estará reservado para as persoas e debidamente protexido. Esta nova urbanización cumpre cos criterios de humanización da Deputación e converte esta rúa en accesible.

As obras contemplan a renovación dos servizos de abastacemento de auga e sumidoiro, con separación de augas pluviais e fecais, así como a preinstalación para electricidade, telecomunicacións e novas acometidas para o alumeado público.

O tempo de execución das obras estímase en 45 días cun orzamento de licitación de 159.490,50 €.

O equipo de goberno continúa deste xeito coa mellora da mobilidade e accesibilidade das rúas e espazos públicos do municipio con humanizacións para o desfrute da cidadanía. O inicio inmediato destas obras atende a criterios do uso desta rúa, posto que co arranque do curso lectivo a Rúa M.R. Sinde absorbe gran parte do tráfico dos pais e familiares do alumnado do Colexio Solanas e da Escola Infantil Municipal.