O Xeodestino presenta a súa renovada marca na Guarda para impulsar un turismo máis competitivo

Onte, a nave das Redeiras da Atalaia, acolleu o acto de presentación da nova marca do Xeodestino. Alcaldesas, alcaldes e edís dos 14 concellos do Xeodestino participaron nun evento de networking de lanzamento da marca con diferentes axentes do territorio.

Unha nova marca cunha imaxe fresca, auténtica, orgánica e amable que agora baixo o nome de Galicia Suroeste busca atraer a viaxeiras e viaxeiros a través de experiencias únicas que combinen natureza, patrimonio, enogastronomía e calidade nos 14 paraísos naturais do territorio. Construír unha nova forma de viaxar, activa e actualizada, na que o Xeodestino sexa o gran protagonista.

Un traballo conxunto que destacou o alcalde A Guarda, Roberto Álvarez Carrero, que sinalou que “xerar sinerxías entre os concellos, compartir experiencias e dinámicas e traballo sempre é positivo. Levamos moitos anos traballando nesta aposta expresa polo turismo de proximidade para converter o Xeodestino nun destino de referencia para Galicia e para España”.

O acto tamén contou coa participación do Subdelegado do Goberno en Pontevedra, Abel Losada; co Xefe Provincial en Pontevedra da Axencia de Turismo de Galicia, Felipe Ferrero; e coa deputada de Turismo Nava Castro.

Durante a xornada, as diferentes empresas locais cun papel fundamental na creación de produto turístico interesante para ofertar no Xeodestino tiveron a oportunidade de participar en dinámicas de networking, fomentando sinerxías e colaboracións que garantan a excelencia nas experiencias ofrecidas.

O evento converteuse na primeira actividade 100% sostible da entidade. Un compromiso firme para levar a cabo prácticas sostibles ambiental, social e economicamente que reflicten o futuro cara ao que camiña o Xeodestino Galicia Suroeste.

Durante o encontro, os integrantes de Papelier, Ramón e Noelia, desvelaron os detalles dunha caixa de agasallo realizada integramente de forma artesanal que se lle entregou a todas e todos os participantes.

Con esta nova marca, o Xeodestino Galicia Suroeste está preparado para ser un referente no turismo sostible, ofrecendo experiencias que combinan a esencia de Galicia coa excelencia en servizos e a beleza natural e patrimonial do territorio.

O Xeodestino encádrase no Plan de Sostibilidade Turística en Destino (PSTD) ‘A Despensa de Galicia’, un programa do Ministerio de Industria, Comercio e Turismo financiado con fondos europeos NextGenerationEU co que promover intervencións integrais para crear destinos turísticos sostibles e resilientes fronte aos efectos do cambio climático.