Orpagu e o Concello da Guarda acordan un Plan de Formación aberto para futuros empregos na planta de Tui

● Esta iniciativa pon en valor o compromiso da Organización de Palangreros Guardeses coa súa localidade, promovendo a formación específica necesaria para xerar emprego estable e de calidade.
● Cunha inversión de máis de seis millóns de euros, a planta frigorífica é o proxecto máis ambicioso de Orpagu e responde á vontade dos seus socios de potenciar e diversificar a súa actividade.
● A planta frigorífica e centro de I+D, que estará plenamente operativa en 2022, creará arredor de 30 postos de traballo na comarca.

O presidente e a directora xerente da Organización de Palangreros Guardeses, Joaquín Cadilla e Juana Parada, mantiveron na mañana deste xoves un encontro co alcalde da Guarda, Antonio Lomba, para establecer as bases dun inminente convenio de colaboración que permita desenrolar un Plan Formativo Específico, aberto a todas e todos os guardeses, en áreas de Loxística, Calidade e Seguridade Alimentaria e Manipulación e Procesado de Produtos da Pesca.
Destes cursos sairán os futuros traballadores da planta frigorífica que Orpagu está construíndo en Tui, que estará plenamente operativa en 2022 e que na súa fase inicial creará arredor de 30 postos de traballo. Os inscritos nos cursos de formación que queden fora dos postos ofertados por Orpagu gozarán desa formación gratuíta, que permitiralles acceder a empregos noutras empresas do ramo, cuxa demanda de traballadores ten aumentado nos últimos anos.

Coa reunión de onte dáse o primeiro paso ao compromiso da Organización de Palangreros Guardeses e do alcalde da Guarda, tralo anuncio de Orpagu da creación da súa planta frigorífica e de I+D, de facilitar todo o proceso para fomentar o emprego na localidade. Despois desta primeira fase do convenio. Haberá unha segunda fase en forma de bolsa de emprego, da que tamén farase eco o Concello guardés.
A nova planta, infraestrutura necesaria para seguir crecendo
Cunha inversión de seis millóns de euros, a planta e centro de I+D emprazarase no parque empresarial de Areas, que conta cunha estratéxica situación polo seu acceso directo á A55 e á Vía Tui-A Guarda. A nave albergará un almacén frigorífico con capacidade para 3.000 toneladas de pescado e unha aula de experimentación para traballar en novos produtos e formatos coa intención de chegar ao maior número de consumidores posible. Desde Orpagu, prevén xerar máis de 30 postos de traballo directos no Baixo Miño cando a planta este a pleno rendemento, o que estimase que suceda no último trimestre de 2022.
Éxito da Marca Orpagu, da Guarda a Estados Unidos
A Organización de Palangreros Guardeses involucrouse fai anos na comercialización dos seus produtos, así como nos seus procesos de transformación e a súa comercialización directa ao consumidor. O éxito da súa tenda e da venda online e a boa acollida das novas presentacións de peixe espada e atún teñen contribuído a fortalecer a presencia da marca destes armadores tanto en España como no exterior (Estados Unidos, Reino Unido, Suiza, Dinamarca, Holanda, Portugal e Alemaña, entre outros).
A iniciativa de Orpagu, que conta coa financiación europea e do Ministerio de Agricultura, Pesca y Alimentación, responde fielmente aos principais obxectivos que rexen o FEMP (Fondo Europeo Marítimo y de Pesca): axuda aos pescadores na transición á pesca sostible; colaboración coas comunidades costeiras para diversificar as súas economías; e apoio a proxectos que xeren emprego e melloren a calidade de vida da poboación no litoral.