Alumnado da Guarda conmemora o Día Internacional das Nenas coa obra de teatro «O Valo»

Unha cativa que foxe da guerra e un rapaz soldado protagonizaron o espectáculo de clown creado por Pallasos en Rebeldía para o Fondo Galego de Cooperación e Solidariedade.

Parte do alumnado dos colexios PP. Somascos, San José-Carmelitas, As Solanas, Manuel Rodríguez Sinde e A Sangriña asistiron esta mañá ao Centro Cultural para visualizar o espectáculo de clown “O Valo”, coincidindo coa conmemoración do Día Internacional das Nenas.

Na obra, creada por Pallaso en Rebeldía para os concellos socios do Fondo Galego de Cooperación e Solidariedade, represéntase o encontro entre unha nena que escapa da guerra e un soldado, gardián devoto das fronteiras móbiles. Esta é, así, unha peza que chama á reflexión dos cativos e cativas poñendo o foco nas fronteiras e a situación das persoas refuxiadas, co obxectivo de evitar o esquecemento das guerras e da xente que delas foxen.

Compre ter en conta que o conflito en Siria obrigou a máis de cinco millóns de persoas a abandonar o país na procura de refuxio, entre as que se achan moitas menores. Elas, especialmente vulnerables á violencia, son as homenaxeadas na obra, para que as teñamos presentes e as súas vidas constitúan o xerme da loita contra todos os valados, muros e fronteiras que separan aos seres humanos.

A tintura cómica da representación, baseada no texto homónimo de Carlos Labraña, cativou aos preto de 150 espectadores; rapazas e rapaces que se atopan cursando 1º da ESO nos centros Pais Somascos e San José-Carmelitas, e o alumnado de 6º de primaria dos centros públicos e concertados da Guarda.

A concelleira de Cultura, Educación e Xuventude, Elena Baz, presentou o espectáculo referíndose á importancia de evitar o esquecemento das guerras e das persoas que se ven obrigadas a fuxir das súas casas.