O Pleno do Concello da Guarda aproba a cesión do Centro de Saúde ao SERGAS
O Pleno do Concello da Guarda aprobou por unanimidade o pasado 26 de xaneiro a cesión gratuíta do Centro de Saúde da Guarda á Consellería de Sanidade, proposta pola alcaldía.
A cesión posibilitará, na práctica, que a entidade dependente da Xunta de Galicia se faga cargo do mantemento das instalacións nas que se ofrece o servizo sanitario de competencia autonómica. Isto suporá un aforro de aproximadamente 23.000 euros anuais para as arcas municipais, que ata o de agora sufragaban o custe do combustible, o consumo eléctrico, a man de obra e os materiais para a reparación de avarías, entre outros conceptos.
A proposta da alcaldía basease no Protocolo asinado en 2008 entre a Federación Galega de Municipios e Provincias (FEGAMP) e a Consellería de Sanidade, no que se establece o procedemento para a asunción dos gastos dos centros de saúde por parte da Consellería, previa cesión ao SERGAS.
Tras anos traballando no proceso de cesión patrimonial, e unha vez superadas os inconvenientes formais para a concesión efectiva, o equipo de goberno logrou sacar adiante por unanimidade a iniciativa. A solicitude da cesión será enviada, xunto coa documentación requirida, á Consellería de Sanidade para que proceda á súa revisión. Unha vez aprobada, procederase á sinatura do convenio de cesión, facéndoa efectiva.
