Aberto o prazo para participar no XXI Certame fotográfico «Viaxando»

As fotografías participantes nesta nova edición do concurso «Viaxando» poderán presentarse ata o 26 de setembro.

As Oficinas Municipais de Información á Xuventude (OMIX) dos concellos de Tomiño, Gondomar, Tomiño, Salceda de Caselas, Baiona, O Rosal, O Porriño, A Guarda e o Espazo Xove de Tui, convocan o XII Certame fotográfico «Viaxando».

O concurso está aberto á participación de mozas e mozos de entre 12 e 35 anos que presenten imaxes orixinais con temática relacionada co título do certame. Cada participante pode presentar unha única fotografía en cor ou branco e negro. Esta deberá presentarse en papel fotográfico cun tamaño de 20X30 e pegadas sobre unha cartolina negra DIN A3.

A fotografía deberá ser orixinal, inédita e non ter sido premiada nin recoñecida ou seleccionada noutros certames. Asemade, deberán estar libres de dereitos que poidan posuír terceiros e, no caso de retratar a persoas menores de idade, concursarán baixo a responsabilidade do autor/a.

Os traballos deberán entregarse nun sobre pechado coa indicación «VIAXANDO» e o pseudónimo da persoa autora no seu exterior. Pola súa parte, as fotografías deberán indicar no dorso o seu título e o pseudónimo da persoa autora. Dentro deste, deberá incluirse outro sobre pechado de menor tamaño en cuxa parte externa debe figurar o pseudónimo da fotógrafa ou fotografo e, no interior, deben recollerse os seguintes datos: nome completo, enderezo, teléfono e fotocopia do DNI ou tarxeta de residencia.

As imaxes poderán entregarse  ata o 26 de setembro en calquera das entidades organizadoras. Concederase un único premio consistente nun curso personalizado de fotografía. Coas imaxes presentadas realizarase unha exposición itinerante que percorrerá o Espazo Xove de Tui e as OMIX que forman parte deste traballo en rede, inaugurándose oficialmente no Concello de Gondomar.As persoas interesadas poderán obter máis información nas Oficinas de Información á Xuventude municipais e descargar as bases do concurso aquí.