A Guarda acolle a presentación do libro “Los secretos de la contrainteligencia”

O autor Jorge Gómez presenta o seu libro “Los secretos de la contrainteligencia”, publicado este mesmo 2025. O autor recala na Guarda pola súa conexión coa vila, lugar de procedencia da súa avoa “A Manoja” e da súa nai, Rosa Pena.

A presentación dará comezo ás 20:30h no Centro Cultural o próximo venres 28 de marzo e despois haberá un coloquio sobre os grandes problemas do mundo actual, como a desinformación.

O libro trata sobre os obxectivos persegue a contraintelixencia e que misións realiza. Por que é importante para o noso país, cales son os nosos inimigos e por que debemos contar cuns servizos de intelixencia á altura das nosas necesidades de defensa e seguridade nacional.

Do CESID ao CNI; da intelixencia de fontes humanas (HUMINT) á loita pola supremacía tecnolóxica; desde a importancia crucial da seguridade nas empresas privadas ata a rivalidade entre España e Marrocos, as inxerencias rusas ou os fallos israelís ante a estratexia de Hamás.

Esta obra está repleta de casos soados como CRYPTO AG, a rede ECHELON ou Pegasus. Jorge Gómez, asesor en seguridade e defensa, oficial da Armada na reserva e exmembro do servizo de intelixencia durante 26 anos, aclara malentendidos e confusións sobre o mundo da espionaxe, á vez que nos ofrece unha detallada análise sobre o que de verdade está en xogo.