A Guarda acolle este xoves a presentación do libro “Unha etapa estelar e conflitiva da Galiza”
• Terá lugar o xoves día 26 de maio ás 20:00h no Centro Cultural da Guarda.
O vindeiro xoves día 26 de maio de 2022 terá lugar na Guarda a presentación do último libro de Francisco Rodríguez, “Unha Etapa Estelar e Conflitiva do Reino de Galiza”. Será ás 20:00h no Centro Cultural, e contaremos coa presenza do propio autor e da escritora Marta Dacosta.
O libro trátase do primeiro volume dunha obra que percorre a etapa medieval de normalidade e esplendor do reino de Galiza e a posterior crise da segunda metade do século XIV. Feito con vontade de deitar luz sobre o noso pasado medieval e as deformacións e ocultacións que sobre ese período se teñen producido, o libro nace tamén da necesidade de colaborar ao coñecemento sobre a nosa historia.
Este Tomo I céntrase en evidenciar a relevancia do reino de Galiza analizando, debatendo e tirando conclusións tanto desde a historiografía oficial e académica como desde as fontes documentais existentes. E, naturalmente, tomando en consideración a importante, e desconsiderada, historiografía que se ten esforzado, xa desde o século XIX, por combater a manipulación que levou a ignorar a existencia relevante do reino de Galiza e a eliminarnos como realidade política específica na Península.
