As escolas do Campus Deportivo trasládanse ó Castelo de Santa Cruz para realizar actividades culturais e lúdicas
Os máis de 100 nenos e nenas participantes no Campus Deportivo organizado polo Concello da Guarda trasladáronse durante a mañá deste venres ó Castelo de Santa cruz, onde realizaron actividades de carácter cultural e lúdico de forma conxunta.
Os membros das tres modalidades deportivas ofertadas no Campus conviviron na fortaleza guardesa, onde realizaron unha xincana orientada á busca de distintos elementos agochados no recinto e relacionados co Castelo de Santa Cruz e a súa historia.
Nesta xornada de programación especial, ademais, as rapazas e rapaces realizaron un obradoiro de cerámica, no que puideron practicar técnicas de modelado do barro. Un segundo taller, relacionado co manexo das pedras, permitiu os participantes coñecer as técnicas de uso e creación de ferramentas prehistóricas. Ámbolos dous obradoiros leváronse a cabo coa colaboración da Deputación de Pontevedra, dentro do Plan Concellos 2017 e como actividade relacionada co centenario do Museo Arqueolóxico de Santa Trega (MASAT).
As escolas de balonmán, fútbol e baloncesto continuarán coas súas actividades deportivas o próximo luns e finalizarán o venres 14 de xullo, cunha festa de despedida.
