Fin de semana de propostas diversas para todas as idades na Guarda

A Guarda recibe unha nova fin de semana do verán chea de programación cultural e deportiva para todas as idades. Exposicións, exhibicións deportivas e de baile, torneo de baloncesto, concertos con Ardentía e Milladoiro, visitas guiadas ao Monte de Santa Trega ou a Festa do Avó, son algunhas das propostas para esta fin de semana na Guarda.

Programación por días:

Venres 20

A Sala de Exposicións da Casa dos Alonso da Guarda acolle este venres día 20 de xullo ás 21:00h a inauguración da Exposición fotográfica «Así Somos», unha mostra que recolle a través de imaxes o día a día da poboación guardesa.

Ás 21:30h o Estadio Municipal da Sangriña da Guarda acolle a II edición da Mostra C.D. Baixo Miño, un evento deportivo con entrada de balde no que se realizarán exhibicións de judo, pilates, baile moderno e zumba.

Sábado 21

Na xornada do sábado día 21 de xullo convidamos a visitar no Museo do Mar a exposición “As achegas das mulleres á sustentabilidade do mar” que, baixo o proxecto “Sustentabilidade en feminino”, busca amosar as achegas das mulleres ao desenvolvemento sustentable e á conservación dos nosos mares, en horario 11:00h a 14:00h e de 18:00h a 21:00h os sábados, domingos e festivos.

Durante a mañá do sábado convidamos tamén a visitar no Centro Cultural a Exposición “Cambia de Perspectiva” de Pablo Lubians, unha mostra de 15 fotografías aéreas capturadas cun drone e que amosan diferentes espazos do municipio cunha perspectiva fora do habitual. Horario: de 10:00h a 13:00h.

Ás 20:30h a Agrupación Musical da Guarda organiza na Casa da Comunidade de Montes de Camposancos unha Mostra musical aberta a todo o público.

Este sábado día 21 de xullo de 2018, as pistas deportivas do Centro Cultural da Guarda acollen a cuarta edición do Torneo de Baloncesto de verán 3×3 Vila da Guarda. O Torneo celebrarase ao longo de toda a xornada deste sábado, e coma ven sendo habitual contarase co acompañamento musical de DJ´s, un torneo de triples para os inscritos e tamén o triple do espectador.

Este sábado día 21 de xullo a partires das 22:30h celébrase unha nova edición de Noites no Castelo, un festival organizado dende a Concellería de Cultura do Concello da Guarda e que está subvencionado pola Deputación de Pontevedra. Nesta cuarta edición contarase coas actuacións dos recoñecidos grupos de música Ardentía e Milladoiro, enchendo de boa música galega este emblemático espazo da vila guardesa, o Castelo de Santa Cruz, declarado Ben de Interese Cultural(BIC).

Durante a xornada do sábado realizaranse tres visitas guiadas ao Monte Santa Trega, ás 11:30h con visita ao castro(Punto de encontro Poboado Castrexo) e ás 12:30 e 17:00h con visita ao Monte(Punto de encontro Museo Arqueolóxico de Santa Trega MASAT).

Domingo 22

O Domingo terá lugar a carreira a pé DepoDesafío, un evento organizado pola Deputación de Pontevedra que levará aos seus participantes polas beiras do Río Miño entre Tomiño, O Rosal e A Guarda, rematando aos pés do Monte Santa Trega, alternando sendeiros con zonas asfaltadas cunha distancia media de 21km e 97m de desnivel.

Na xornada do Domingo 22 de xullo o Porto da Guarda será o escenario para unha nova edición da Festa do Avó, que terá inicio ás 17:00h e contará con actuacións musicais e homenaxe aos maiores, evento organizado polo Clube da Terceira Idade e Pensionistas da Guarda en colaboración co Concello da Guarda.

Tamén na xornada do Domingo o Auditorio de San Bieito acolle ás 20:00h a actuación de Baile Talent Latino, organizada por Studio 88, baixo a dirección de Josué Álvarez e presentado por Astrid Steinbrüggen, un espectáculo de danza e baile que porá o broche final a esta fin de semana de verán na vila da Guarda.

Durante a xornada do domingo teredes unha nova oportunidade de coñecer o Monte Santa Trega con visitas guiadas, ás 11:30h con visita ao Castro(Punto de encontro Poboado Castrexo) e ás 12:30 e 17:00h con visita ao Monte(Punto de encontro Museo Arqueolóxico de Santa Trega MASAT).