Nova estrea teatral na Guarda da man do colectivo FOCO

Esta semana volvemos ter unha nova estrea teatral. Desta volta vén da man da asociación local FOCO, que estrean este sábado 14 “Inanición. A historia dunha lingua esfomeada”.

Esta obra nace deste grupo de mozos e mozas da Guarda que decidiron co-crear esta obra tras unha visita inspiradora do autor Carlos Callón presentando o seu Libro Negro da Lingua Galega.

“Inanición” encáixase no marco do proxecto europeo de FOCO, Linguas Novas. Os integrantes de FOCO din que “o proceso creativo incluíu investigación, lectura, entrevistas á veciñanza, improvisación e deseño escénico e colaborativo”.

Todo un traballo cuxo resultado poderemos desfrutar por primeira vez este sábado 14 de xuño ás 19:00h no Centro Cultural da Guarda.

FOCO reflexiona desde o escenario sobre a situación da lingua galega na nosa contorna con esta peza colectiva. O alcalde da Guarda, Roberto Carrero, convida a todos e todas a acudir a esta estrea, xa que “FOCO destaca pola súa orixinalidade, pois a hai meses presentaba na praza do Reló unha obra interactiva moi diferente e que mostra a creatividade destes mozos e mozas da Guarda”.

Sobre FOCO

FOCO é unha asociación con sede na Guarda (Pontevedra) fundada por persoas procedentes de diferentes ámbitos que pretende facer avanzar o campo da educación non formal mediante proxectos formativos e creativos e iniciativas innovadoras.

Con actividades relacionadas co teatro e a representación teatral tentan facer chegar á xente nova os valores democráticos, mais tamén medioambientais, de cooperación e convivencia…