O Concello da Guarda asina un convenio de colaboración con Acougo

O Concello da Guarda asina un convenio de colaboración con Acougo, a Asociación galega de familias de acollida. O obxectivo é fomentar programas de atención, formación e difusión en materia de protección de menores, así como medidas específicas para o acollemento familiar.

Con esta colaboración preténdese crear novas oportunidades de formación e sensibilización tanto para profesionais no sector como para novas familias locais interesadas no acollemento familiar.

Acougo defende como obxectivo principal da súa acción o achegar á sociedade a realidade dos nenos e nenas en situación de desprotección e, a partir de aí, tratar coas familias acolledoras ou potencialmente acolledoras para ofrecer a preparación, a orientación, o acompañamento e o apoio para dotalas de competencias no manexo das dificultades e necesidades específicas dos menores acollidos.

Un primeiro paso para dar a coñecer o labor desta asociación na Guarda, foi a súa participación na V Mostra Asociativa no pasado mes de setembro, onde moitos descubriron a importante acción social de Acougo.