Primeira, e moi esperanzadora, sesión de “Conversas coa Xuventude”
Nesta ocasión participaron o ex alcalde guardés, José Manuel Domínguez Freitas e o actual alcalde Antonio Lomba
Esta fin de semana celebrouse a primeira das sesións do ciclo “Conversas coa Xuventude”, que nace no Concello da Guarda coa intención de crear un espazo de encontro entre a administración local e a mocidade do municipio.
Este primeiro encontro contou coa presenza do ex alcalde guardés José Manuel Domínguez Freitas e coa do actual alcalde, Antonio Lomba. O acto foi presentado pola Concelleira de Xuventude Elena Baz.
O primeiro en tomar a palabra foi Freitas quen fixo un percorrido entre as diferentes accións que se levaron a cabo en temas de Xuventude durante os oito anos que el foi alcalde. Así, o ex alcalde guardés falou e explicou que, aínda que algunhas actividades ou accións non fosen programadas directamente para a mocidade, sempre, “de forma transversal” aparecía a xuventude. Desta maneira afirmou que durante o seu mandato, e tamén nesta lexislatura, os mozos e as mozas da Guarda son unha peza fundamental.
Pola súa banda, Antonio Lomba, afirmou que, aínda que é complicado que as políticas de xuventude cheguen a conectar cos mozos e mozas, este tipo de actos son “moi esperanzadores” xa que é “moi positivo e importante” que a mocidade participe na política municipal.
O alcalde da Guarda aproveitou este encontro para presentar os alí presentes un novo programa dirixido a eles. Así, Lomba, explicou que quere implicar a xuventude da Guarda cunha nova iniciativa na que se busca ofrecer a Guarda coma un espazo de expresión artística. “Queremos que a xente poida entender o os espazos e o mobiliario público coma propios. Ofrecer a xente a posibilidade de actuar sobre eles para embelecelos e convertelos así en algo propio, ”, dixo Lomba. E continuou: “facendo que verdadeiramente A Guarda sexa cousa de todos”
Esta foi a primeira das xornadas abertas que o Concello ten programadas coa xuventude. Nestes encontros o que se busca é facilitar ferramentas de participación directa entre a mocidade e o goberno local.
Espérase que nos seguintes encontros sexa un maior número de mozos e mozas os que acudan e expoñan as súas propostas, necesidades e demandas ó goberno local.
O obxectivo final é tecer redes de colaboración para conseguir melloras para toda a poboación da vila, especialmente para a máis nova.
