As visitas teatralizadas continúan mañá, tras unha primeira experiencia con boa acollida e gran afluencia

Tralo éxito da semana anterior, este xoves 20 de xullo continúan as visitas teatralizadas na vila da Guarda, cun percorrido polo centro histórico no que se pretende amosar dun xeito ameno e diferente a historia e o patrimonio da noso pobo.

Máis dun centenar de persoas uníronse á experiencia teatral na súa primeira saída, que tivo lugar o pasado xoves ás 21:30 horas dende a Praza da Igrexa. O itinerario, que se repetirá semanalmente, continua pola Praza do Reló, a rúa Colón, a rúa Baixo Muro, a rúa José María Lomba Peña e a rúa Malteses, ata chegar ó porto da Guarda.

Os actores protagonistas, Lucho Penabade e Tero Rodríguez da compañía Os Quinquilláns, dan vida a dous personaxes influentes da Guarda de 1930 que, por mor da chegada do primeiro guardés a Porto Rico, congregan á poboación no centro da vila para gravar unha película que remitirán á sociedade guardesa en América.

Os asistentes convértense en protagonistas do filme, no que se recollen os diferentes monumentos e lugares emblemáticos do centro da vila. Esta é, así, unha experiencia teatral divertida e participativa, na que a improvisación e a e a divulgación do noso pasado conviven. Engádese a estes elementos as actuacións musicais, coa intervencións de artistas destacados como Paco Nogueiras ou o dúo Barahunda. Estes últimos foron os encargados de amenizar a noite no porto guardés o pasado xoves e, de seguro, repetirán mañá como banda sonora da experiencia teatral.

Esta actividade, que conta co financiamento da Deputación de Pontevedra con cargo ao Plan Concellos 2017, repetirase semanalmente durante todo o verán ata o vindeiro 7 de setembro, polo que dende o Concello da Guarda animamos á poboación local e ós visitantes que se achegan nesta época a participar nas visitas teatralizadas, que partirán da Praza da Igrexa ás 21:30 horas.