O Concello da Guarda organiza a XXIII Travesía a Nado Porto da Guarda
A proba deportiva celebrarase o 7 de xullo, coincidindo coa celebración da Festa da Langosta e da Cociña Mariñeira | O período de inscrición da XXIII Travesía a nado permanecerá aberto entre os días 11 e 29 de xuño.
A tradicional Travesía a Nado Porto da Guarda chegará a súa vixésimo terceira edición o vindeiro 7 de xullo, coincidindo coa celebración da Festa da Langosta e da Cociña Mariñeira (do 6 ao 8 de xuño). A proba deportiva admitirá a participación de persoas de todas as idades, tanto federadas como non federadas, con categorías feminina e masculina e 6 subcategorías por rangos de idade.
A travesía partirá do peirao ás 12:00 horas, con dous percorridos en función da idade dos participantes. Así, os rapaces e as rapazas de ata 11 anos realizarán un percorrido de 400 metros, namentres as persoas de 12 anos en diante percorrerán unha distancia de 1.200 metros no interior do porto guardés.
O período de inscrición permanecerá aberto entre os días 11 e 29 de xuño. As persoas interesadas en participar poderán anotarse na proba a través da páxina web do Concello da Guarda, premendo na imaxe da XXIII Travesía a nado Porto da Guarda e cumprimentando o formulario enlazado. Poderán ollar e descargar o regulamento da proba nesta ligazón.
Os menores de idade non federados deberán achegar o formulario de autorización (descargable aquí) asinado polo seu pai, nai ou titor/a legal ao correo electrónico turismo@aguarda.es. Para máis información, poderán dirixirse á Oficina Municipal de Turismo, chamando ao teléfono 986 614 546 ou ben a través do correo electrónico turismo@aguarda.es.
A XXIII Travesía a nado Porto da Guarda é un evento organizado pola Concellería de Deportes do Concello da Guarda en colaboración co Club de Remo Robaleira, o club Alagua, a Cofradía de Pescadores Santa Tecla e a empresa Río Verde motores forabordas.
You may also like
-
O Monte Trega decidirá este sábado o gañador do Gran Camiño
15 April, 2026
