As asociacións participan na campaña «Decora o teu Nadal» embelecendo A Guarda
Un total de 12 asociacións participaron este ano na campaña «Decora o teu Nadal», situando as súas montaxes navideñas en diferentes prazas e puntos da Vila.
A campaña «Decora o teu Nadal», impulsada polo Concello da Guarda, contou coa colaboración de ata doce asociacións, case o dobre das participantes o pasado ano, para embelecer a vila nestas datas. Cada unha delas ocupou unha praza ou lugar representativos da vila para colocar as súas orixinais montaxes de Nadal, feitas na súa meirande parte con materiais de refugallo.
A concelleira de Cultura, Elena Baz, quixo visitar na mañá do pasado martes, 12 de decembro, todos os recunchos ocupados coas decoracións que elaboraron as diferentes asociacións.
O orixinal escenario que se pode contemplar na entrada principal do Centro de Saúde é obra da asociación de nova creación Rock’n’rolla, namentres a Asociación de Mulleres Progresistas decorou unha das árbores e a balaustrada da entrada do Centro Cultural, con motivos moi propios do Nadal.
O Sporting Guardés achegou o deporte á Alameda da Guarda, coas cores propias do seu club e a decoración das árbores. San Xerome, pola súa parte, volveu engalanar a árbore da coñecida como “Alamediña”, utilizando rodas de bicicleta pintadas de diferentes cores.
A Cruz Vermella tamén colaborou coa decoración dunha das praciñas da contorna da Igrexa, a base de palets de madeira, e a Sociedade Atlética do Trega optou tamén polo uso da madeira como base da súa obra, así como de neumáticos reutilizados como boneco de neve.
A Agrupación Cultural Guardesa embeleceu o Sinde Vello coas súas redes e motivos musicais á par que mariñeiros. Por outra parte, este ano contamos coa colaboración por vez primeira da Unión Deportiva A Guía Guardesa, que se encargou da decoración da Praza da Guía, namentres Vento Mareiro volveu adornar a Praza do Reló, cunha estructura de madeira que semella unha árbore de Nadal e un enorme anxo que descansa nunha esquina da praza.
Outra asociación que repite situación é Avelaíña. A Praza do Coruto quedou engalanada cunha enorme torta, rodeada de estrelas de tódalas cores e, por último, a Xamaraina encomendóuselle a Praza de Salcidos, a cal decoraron con diferentes motivos de Nadal (bastóns típicos destas datas, Papá Noel ou agasallos).
O Concello da Guarda anima a tódolos veciños e veciñas a gozar destas decoracións con responsabilidade e agradece a implicación das asociacións nesta campaña de Nadal, que está sendo todo un éxito de participación.
